Fani Badayuni
dair men ya haram men guzregi
umr tere hi gham men guzregi
kuchh umid-e-karam men guzri umr
kuchh umid-e-karam men guzregi
zindagi yad-e-dost hai yaani
zindagi hai to gham men guzregi
ab karam ka ye ma-hasal hai ki umr
yad-e-ahd-e-sitam men guzregi
dil ko shauq-e-nashat-e-vasl na chheḌ
gham men guzri hai gham men guzregi
hasrat-e-dam-ba-dam men guzri umr
ibrat-e-dam-ba-dam men guzregi
hashr kahte hain jis ko ai ‘fani’
vo ghaḌi sharah-e-gham men guzregi
Leave a Reply