Fani Badayuni
bijliyan TuuT paḌin jab vo muqabil se uTha
mil ke palTi thiin nigahen ki dhuan dil se uTha
jalva mahsus sahi aankh ko azad to kar
qaid-e-adab-e-tamasha bhi to mahfil se uTha
phir to mizrab-e-junun saz-e-ana-laila chheḌ
haa.e vo shor-e-anal-qais ki mahmil se uTha
iḳhtiyar ek ada thi miri majburi ki
lutf-e-sa.i-e-amal is matlab-e-hasil se uTha
umr-e-ummid ke do din bhi giran the zalim
bar-e-farda na tire vada-e-batil se uTha
ḳhabar-e-qafila-e-gum-shuda kis se puchhun
ik bagula bhi na ḳhak-e-rah-e-manzil se uTha
hosh jab tak hai gala ghonT ke mar jaane ka
dam-e-shamshir ka ehsan tire bismil se uTha
maut hasti pe vo tohmat thi ki asan na uThi
zindagi mujh pe vo ilzam ki mushkil se uTha
kis ki kashti tah-e-girdab-e-fana ja pahunchi
shor-e-labbaik jo ‘fani’ lab-e-sahil se uTha
Leave a Reply