Faizul Amin Faiz
maali ko sazishon pe yuun uksa diya gaya
kaliyan banen na phuul ye samjha diya gaya
sach bolne ki jis ne jasarat ki dosto
phansi pe ek din use laTka diya gaya
manzil mire nasib men likh di ga.i magar
pur-pech rasta mujhe dikhla diya gaya
ḳhud ko samajh rahe hain vahi log hoshiyar
jin ko ḳhirad ki raah se bhaTka diya gaya
phir mai-kade men TuuT ga.i tauba shaiḳh ki
jab muft men sharab ka pyala diya gaya
baapu ne jo diya tha sabaq yaad hai hamen
phir zahr kyon samaj men phaila diya gaya
mahnga.i ‘faiz’ chhune lagi hai ab asman
dilli ke taḳht par kise baiTha diya gaya
Leave a Reply