de ga.e zaḳhm mire chahne vaale mujh ko
aaj tanha huun bahut koi sambhale mujh ko
Dubne vaale ko tinke ka sahara bhi bahut
koi aisa ho ki aa kar jo bacha le mujh ko
vo jo kahte the ki jivan ki ḳhushi ho tum hi
kar ga.e aaj vahi gham ke havale mujh ko
dil-e-sad-chak ko vo ḳhaar se karta hai rafu
haa.e ye baḳhiya-gari maar na Daale mujh ko
ek muddat se main ḳhud se bhi huun ruThi ruThi
ai miri jaan kabhi aa ke mana le mujh ko
hai safar dasht ka mushkil to magar himmat kar
hausla dene lage paanv ke chhale mujh ko
yaad aati hai mujhe maan ki vo mamta aksar
laaD se jab vo khilati thi nivale mujh ko
Leave a Reply