baḌha di ik nazar men tu ne kya tauqir patthar ki
bana kohl-ul-basar allah re taqdir patthar ki
asir-e-zulf kyunkar chhuT sakenge qaid-e-vahshat se
ki hai har jada-e-dasht-e-junun zanjir patthar ki
ye jalva hai kunisht-o-dair men saan.e ki qudrat ka
ki dava-e-ḳhuda.i karti hai tasvir patthar ki
talash-e-rizq men ho asiya ki tarah sargardan
agar daana hai tu bhi siikh le tadbir patthar ki
bata sang-e-jarahat aa ke zaḳhm-e-tegh-e-abru par
hua achchha tire ashiq ko di ta.azir patthar ki
fusun-e-chashm-e-qatil se bana huun sehr ka putla
jo chhu le meri gardan ko to ho shamshir patthar ki
shab-e-furqat men jo soche the karte vo shikayat kya
nazar karte hi un par ban ga.e tasvir patthar ki
na nikli hai na niklegi jami hai dil men jo un ke
miTane se bhi miTti hai kahin tahrir patthar ki
saza-e-ishq-e-mizhgan-e-butan-e-sang-dil paa.i
hui barish har ik janib se ham par tiir patthar ki
na farq aaya ‘habib’-e-sabir-o-shakir ki rahat men
bana duniya men qismat ka likha tahrir patthar ki
Leave a Reply