Fahmi Badayuni
zara mohtat hona chahiye tha
baghair ashkon ke rona chahiye tha
ab un ko yaad kar ke ro rahe hain
bichhaḌte vaqt rona chahiye tha
miri va.ada-ḳhilafi par vo chup hai
use naraz hona chahiye tha
chala aata yaqinan ḳhvab men vo
hamen kal raat sona chahiye tha
sui dhaga mohabbat ne diya tha
to kuchh siina pirona chahiye tha
hamara haal tum bhi puchhte ho
tumhen ma.alum hona chahiye tha
vafa majbur tum ko kar rahi thi
to phir majbur hona chahiye tha
Leave a Reply