ham ek din nikal aa.e the ḳhvab se bahar
so ham ne ranj uTha.e hisab se bahar
isi umiid pe guzri hai zindagi saari
kabhi to ham se miloge hijab se bahar
tumhari yaad nikalti nahin mire dil se
nasha chhalakta nahin hai sharab se bahar
kisi ke dil men utarna hai kar-e-la-hasil
ki saari dhuup to hai aftab se bahar
‘shanas’ khol diye jis ne ham pe sab asrar
vo ek lafz mila hai kitab se bahar
Leave a Reply