chup khaḌe hain darmiyan-e-ka.aba-o-but-ḳhana ham
kis taraf jaa.en bata ai jalva-e-janana ham
azmat-e-rafta se itne ho ga.e begana ham
ban ga.e hain apni hi nazron men aaj afsana ham
haa.e ye majmua-e-sar-masti-o-kaif-o-ḳhumar
tak rahe hain teri ankhon ko liye paimana ham
bevafa sham.en bahar-su DhunDhti hain ab hamen
miT ga.e jab surat-e-ḳhakistar-e-parvana ham
hain nigahon men abhi tak tuur ki rusva.iyan
ab kahan jur.at ki dekhen jalva-e-janana ham
arzu-e-sajda-rezi had se baḌh jaati hai jab
sar tire qadmon pe rakh dete hain betabana ham
pa-e-saqi tak jabin-e-shauq ko pahuncha diya
tere mamnun-e-karam hain laghzish-e-mastana ham
Leave a Reply