Poet
munavvar ho ke kitni dastan-e-ashiqi aa.i
jahan tak zikr-e-gham aaya nazar men raushni aa.i
tiri ik ik nazar le kar payam-e-zindagi aa.i
miri janib se lekin kab mohabbat men kami aa.i
jabin-e-shauq men jab koi shan-e-kafiri aa.i
to istiqbal karne har qadam par bandagi aa.i
ye jan-e-ashiqi hai is ko kis dil se juda kar duun
na jaane kitne gham sah kar to mujh tak bekasi aa.i
zahe qismat ki us ko dard-e-mahrumi pasand aaya
mohabbat aish-e-do-alam ko Thukrati hui aa.i
ye aalam hai to phir zabt-e-mohabbat se bhi kya hasil
zaban par un ka naam aaya ki ankhon men nami aa.i
kisi surat men ho ye dil ki nisbat chhup nahin sakti
mire rone pe aḳhir ik tumhin ko kyon hansi aa.i
Leave a Reply