rang aur nuur ki tamsil se hoga ki nahin
shab ka matam miri qindil se hoga ki nahin
dekhna ye hai ki jangal ko chalane ke liye
mashvara richh se aur chiil se hoga ki nahin
ayat-e-tira-shabi paḌhte hue umr hui
samna ab bhi azazil se hoga ki nahin
zard miTTi men utarti hui ai qaus-e-quzah
ḳhvab paida tiri tarsil se hoga ki nahin
os ke phuul mahakte hain tiri a.ankhon men
in ka rishta bhi kisi niil se hoga ki nahin
jab suḳhan karne lagunga main tujhe asr-e-ravan
isti.ara koi injil se hoga ki nahin
Leave a Reply