naya saman hai naya ik jahan hai aur ham hain
na.i zamin naya asman hai aur ham hain
na.e maqam na.e marhale na.i rahen
na.e irade naya karvan hai aur ham hain
hamare naqsh-e-qadam hain ye mehr-o-mah-o-nujum
hamari raah sar-e-kahkashan hai aur ham hain
vo jis hayat pe thi marg-e-na-gahan taari
vahi hayat hai aur javedan hai aur ham hain
ga.i vo qissa-e-ahd-e-kuhan ki baat ga.i
naya zamana na.i dastan hai aur ham hain
ham apne sud-o-ziyan ke hain aap zimmedar
hamara suud hamara ziyan hai aur ham hain
vahi qafas jo kabhi ashiyan hamara tha
vahi qafas hai ki ab ashiyan hai aur ham hain
hue hain dair-o-haram se hamare kuchh paiman
hamare un ke ḳhuda darmiyan hai aur ham hain
har ek rang ke phuul us men hain sharik-e-bahar
hamara mushtarak ik gulistan hai aur ham hain
hamen bhi zehn-o-fikr apne badalne hain ‘bismil’
na.e ḳhayal ka hindostan hai aur ham hain
Leave a Reply