Nigah-E-Qahr Hogi Ya Mohabbat Ki Nazar Hogi

Bismil Azimabadi

nigah-e-qahr hogi ya mohabbat ki nazar hogi

maza de ja.egi dil se agar ai sim-bar hogi

tumhen jaldi hai kya jaana abhi to raat baaqi hai

na ghabrao zara Thahro koi dam men sahar hogi

abhi se saare aalam men to ik andher barpa hai

na jaane kya ghazab Dha.egi jab ye ta-kamar hogi

na la.egi to kya bechain bhi un ko na kar degi

hamari aah kya kam-baḳht itni be-asar hogi

ham us ko dekh lenge aur vo ham ko na dekhegi

nigah-e-yar kya mahfil men itni be-ḳhabar hogi

chala jaata to huun main bahrup ban kar un ki mahfil men

kahunga kya rasa.i gar kahin munh dekh kar hogi

nigah-e-lutf se dekhega mujh ko ik jahan to kya

agar tum dekh loge meri qismat arsh par hogi

asiri men bhi yad-e-gul karegi is tarah bulbul

qafas ke dar pe sar hoga, su-e-gulshan nazar hogi

jo be-jurmi pe bhi ‘bismil’ ko tum ne kar diya bismil

bataoge bhala kya hashr men pursish agar hogi