vaa.iz ki zid se rindon ne rasm-e-jadid ki
ya.ani mah-e-siyam ki pahli ko iid ki
marne ke ba.ad bhi ye tamanna thi diid ki
ankhen huiin na band tumhare shahid ki
phir jins-e-dil na apni kisi ne ḳharid ki
sach hai ki qadr kuchh nahin mal-e-mazid ki
ye vaqt-e-chashm-e-poshi-e-ahl-e-vafa nahin
jaan ankhon men hai yaar tire mahv-e-did ki
missi dahan-e-tang ki dekhi to shak hua
angushtari hai koi nagin-e-hadid ki
vo shoḳh jang-ju jo hamare gale mila
matam muḳhalifon ne muhibbon ne iid ki
aalam hai chashm-e-shauq ka har ek zarre men
barbad ḳhaak hai ye kisi mahv-e-did ki
kya be-nuqat suna.i hain us tifl-e-shauq ne
qasid ne naama de ke talab jab rasid ki
kyuun vo saval-e-vasl ka dete nahin javab
hajat hai un ke qufl-e-dahan ko kalid ki
ghusse se aag ho ke hue tar pasine men
itr-e-bahar husn ki apne kashid ki
kis roz main ne mus.haf-e-ruḳhsar mas kiya
jhuTi na qasmen khaao kalam-e-majid ki
dekhe na pir-zal jahan ko uTha ke aankh
mardon men aabru nahin kuchh zan-murid ki
be-shubah ai ‘qalaq’ sag-e-duniya hai vo bashar
jis ne ba-dil ita.at-e-nafs-e-palid ki
Leave a Reply