zulf-e-daraz se ye numayan hai ghaliban
bhalu ki shakl ka koi insan hai ghaliban
qaul o amal men jis ke nazar aa.e kuchh tazad
vo maulvi nahin koi shaitan hai ghaliban
gulshan men to gulon ka kahin naam tak nahin
ye baghban ke haath men ghoiyan hai ghaliban
hota hai us ki shoḳhi-e-guftar par guman
lahbaḌ nahin hai ye koi Toiyan hai ghaliban
hota nahin hai ab jo namak-pashiyon ka daur
bas ḳhali ḳhali un ka namak-dan hai ghaliban
bulbul ghunudgi men hai aur phuul muzmahil
afyunchi ye saara gulistan hai ghaliban
firqa-parastiyon ne khila.e kuchh aise gul
samjhe ye log fasl-e-baharan hai ghaliban
yuun be-tahasha piine lage mai-kade men shaiḳh
Tharra bhi ab to bada-e-irfan hai ghaliban
rah kar hamari gardish-e-qismat ke saath saath
chakkar men ḳhud bhi gardish-e-dauran hai ghaliban
hurmat ka us ki aap ko vaa.iz jo hai ḳhayal
bint-e-inab huzur hi ki maan hai ghaliban
har samt jo jalajal-o-qarna ka shor hai
ghazi-miyan ke byaah ka saman hai ghaliban
ai ‘shauq’ har tarah ke nazar aa rahe hain husn
naḳhḳhas hi men kucha-e-janan hai ghaliban
Leave a Reply