aaj andhera miri nas nas men utar jaega
ankhen bujh jaengi bujh jaenge ehsas o shuur
aur ye sadiyon se jalta sa sulagta sa vajud
is se pahle ki sahar mathe pe shabnam chhidke
is se pahle ki miri beti ke vo phuul se haath
garm rukhsar ko thandak bakhshen
is se pahle ki mire bete ka mazbut badan
tan-e-mafluj men shakti bhar de
is se pahle ki miri biivi ke hont
mere honton ki tapish pi jaaen
raakh ho jaega jalte jalte
aur phir raakh bikhar jaegi
zindagi kahne ko be-maya sahi
gham ka sarmaya sahi
main ne is ke liye kya kya na kiya
kabhi asani se ik saans bhi yamraj ko apna na diya
aaj se pahle bahut pahle
isi angan men
dhup-bhare daman men
main khada tha mire talvon se dhuan uthta tha
ek be-nam sa be-rang sa khauf
kachche ehsas pe chhaya tha ki jal jaunga
main pighal jaunga
aur pighal kar mira kamzor sa ”main”
qatra qatra mire mathe se tapak jaega
ro raha tha magar ashkon ke baghair
chikhta tha magar avaz na thi
maut lahrati thi sau shaklon men
main ne har shakl ko ghabra ke khuda maan liya
kaat ke rakh diye sandal ke pur-asrar darakht
aur patthar se nikala shoala
aur raushan kiya apne se bada ek alaav
janvar zabh kiye itne ki khuun ki lahren
paanv se uth ke kamar tak aaiin
aur kamar se mire sar tak aaiin
som-ras main ne piya
raat din raqs kiya
nachte nachte talve mire khuun dene lage
mire aaza ki thakan
ban gai kanpte honton pe bhajan
haddiyan meri chatakhne lagin indhan ki tarah
mantar honton se tapakne lage roghan ki tarah
”agni maata miri agni maata
sukhi lakdi ke ye bhari kunde
jo tiri bhent ko le aaya huun
un ko svikar kar aur aise dhadhak
ki machalte shoale khinch len josh men
suraj ki sunahri zulfen
aag men aag mile
jo amar kar de mujhe
aisa koi raag mile”
agni maan se bhi na jiine ki sanad jab paai
zindagi ke nae imkan ne li angdai
aur kanon men kahin duur se avaz aai
buddham sharadam gachhami
dhammam sharadam gacchami
sangham sharadam gacchami
chaar abru ka safaya kar ke
be-sile vastr se dhanpa ye badan
ponchh ke patni ke mathe se damakti bindiya
sote bachchon ko bina pyaar kiye
chal pada haath men kashkol liye
chahta tha kahin bhiksha hi men jivan mil jaae
jo kabhi band na ho dil ko vo dhadkan mil jaae
mujh ko bhiksha men magar zahr mila
hont tharrane lage jaise kare koi gila
jhuk ke suuli se usi vaqt kisi ne ye kaha
tere ik gaal pe jis pal koi thappad maare
dusra gaal bhi aage kar de
teri duniya men bahut hinsa hai
us ke siine men ahinsa bhar de
ki ye jiine ka tariqa bhi hai andaz bhi hai
teri avaz bhi hai meri avaz bhi hai
main utha jis ko ahinsa ka sabaq sikhlane
mujh ko latka diya suuli pe usi duniya ne
aa raha tha main kai kuchon se thokar kha kar
ek avaz ne roka mujh ko
kisi minar se niche aa kar
allahu-akbar allahu-akbar
hua dil ko ye guman
ki ye pur-josh azaan
maut se degi amaan
phir to pahuncha main jahan
main ne dohrai kuchh aise ye azaan
guunj utha saara jahan
allahu-akbar allahu-akbar
isi avaz men ik aur bhi gunja elaan
kullo-man-alaiha-fan
ik taraf dhal gaya khurshid-e-jahan-tab ka sar
hua falij ka asar
phat gai nas koi shiryanon men khuun jam sa gaya
ho gaya zakhmi dimagh
aisa lagta tha ki bujh jaega jalta hai jo sadiyon se charagh
aaj andhera miri nas nas men utar jaega
ye samundar jo badi der se tufani tha
aisa tadpa ki mire kamre ke andar aaya
aate aate vo mire vaste amrit laaya
aur lahra ke kaha
shiv ne ye bhejvaya hai lo piyo aur
aaj shiv ilm hai amrit hai amal
ab vo asan hai jo dushvar tha kal
raat jo maut ka paigham liye aai thi
biivi bachchon ne mire
us ko khidki se pare phenk diya
aur jo vo zahr ka ik jaam liye aai thi
us ne vo khud hi piya
subh utri jo samundar men nahane ke liye
raat ki laash mili paani men
Leave a Reply