zindagi kuchh soz hai kuchh saaz hai
duur tak bikhri hui avaz hai
ḳhamushi us ki hai misl-e-guftugu
har nazar jazbat ki ghammaz hai
kis tarah zinda huun tujh ko dekh kar
zindagi mujh par tabassum-saz hai
jan-faza naghmat ka ḳhaliq hai ye
dil agarche ik shikasta saaz hai
is tarah qaa.em hai raqs-e-zindagi
saaz us ka hai miri avaz hai
kya bata.un aaj ke is daur men
aadmi kitna zamana-saz hai
is liye rakhta huun main us ko aziiz
haq-parasti ruuh ki avaz hai
baḳhtan hai pattharon ki sarzamin
phir bhi mujh ko is pe kitna naaz hai
manzil-e-maqsud tak pahunchegi ‘arsh’
ruk na pa.egi miri avaz hai
Leave a Reply