Zindagi Dasht Mein Jab chhoD Ke Aati Hai Hamein

zindagī dasht meñ jab chhoḌ ke aatī hai hameñ

terī yādoñ kī mahak DhūñDh ke laatī hai hameñ

rakh de āñkhoñ pe merī ġhaflatoñ vaalā chashma

is se duniyā baḌī behtar nazar aatī hai hameñ

ek hī taal meñ har nabz kā chalte rahnā

tum na samjhoge ye tartīb Darātī hai hameñ

dard-e-tanhā.ī taḌap soz ḳhalā bechainī

lafz kyā kyā ye mohabbat bhī sikhātī hai hameñ

jitnī mushkil se nibhāte haiñ mohabbat ham tum

utnī mushkil se mohabbat bhī nibhātī hai hameñ

Leave a Comment