Raziya Subhan
zindagi dard ka nisab rahi
aur kabhi naghmagi ka baab rahi
ḳhuun alud the sabhi chehre
main magar surḳhi-e-gulab rahi
niile paani pe mun.akis jo hue
main vo mahtab-o-aftab rahi
vo muḳhatab nahin hua mujh se
phir bhi main markaz-e-ḳhitab rahi
nafraton ke jahan men ‘raziya’
main mohabbat ka intisab rahi
harf shaa.e na ho sake mere
varis-e-sahab-e-kitab rahi
Leave a Reply