zindagi-bhar ek hi kar-e-hunar karte rahe
ik gharaunda ret ka tha jis ko ghar karte rahe
ham ko bhi maalum tha anjam kya hoga magar
shahr-e-kufa ki taraf ham bhi safar karte rahe
ud gae saare parinde mausamon ki chaah men
intizar un ka magar budhe shajar karte rahe
yuun to ham bhi kaun sa zinda rahe is shahr men
zinda hone ki adakari magar karte rahe
aankh rah takti rahi dil us ko samjhata raha
apna apna kaam donon umr-bhar karte rahe
ik nahin ka khauf tha so ham ne puchha hi nahin
yaad kya ham ko bhi vo divar-o-dar karte rahe
Leave a Reply