zauq-e-suḳhan ko ab to tere aag lagana achchha hai
muflis ghar ki halat hai aur sher sunana achchha hai
meri sachchi chahat dekhi kah baiTha vo mahfil men
mere sab divanon men se ye divana achchha hai
tir-e-nazar se aisa maare dil ka panchhi taab na le
duniya ghar ke sayyadon se us ka nishana achchha hai
shaiḳh to masjid men jaata hai andar se dil kaala hai
sachche aabid jahan khaḌe huun vo but-ḳhana achchha hai
aisi chaal kahan duuje ki kyuun tu aisa kahta hai
vaise tu ne parde men mujh ko pahchana achchha hai
auron ko talqin kare hai lekin ‘sarvar’ naseh ka
mai-ḳhane men chupke chupke ana-jana achchha hai
Leave a Reply