zaat ke gard fasilen hain riyazat ma.alum
sirf jannat ke liye hai to ibadat ma.alum
ye bhi ik shan-e-rahimi hai tiri izz-o-jal
na to manzil ki ḳhabar hai na masafat ma.alum
vo bhi ik shaḳhs hai saada sa magar pechida
na khuli us ki mohabbat na adavat ma.alum
zaḳhm-e-dil ho ga.e ḳhandan vo mulaqat hui
hai mujhe aap ka andaz-e-ayadat ma.alum
vahi qatil vahi munsif vahi aini shahid
adl aur aap ki mizan-e-adalat ma.alum
janch ka hukm haqa.eq ki hai parda-poshi
un ko pahle se hain asbab-e-baghavat ma.alum
aise-vaise hue is shahr men kaise kaise
ahl-e-dastar ki hai ham ko najabat ma.alum
ḳhun-e-nahaq se hain buniyaden bhari mahlon ki
qatl hote the jo hoti thi siyadat ma.alum
Leave a Reply