zamin bana.i ga.i asman banaya gaya
bara.e-ishq ye saara jahan banaya gaya
tumhari na ko hi aḳhir men haan banaya gaya
yaqin ke chaak pe rakh kar guman banaya gaya
tum us ke paas ho jis ko tumhari chaah na thi
kahan pe pyaas thi dariya kahan banaya gaya
hamare saath koi do qadam bhi chal na saka
kisi ke vaste ik karvan banaya gaya
badal ke dekh lo tum jism chahe auron se
vahin pe Thiik hai jis ko jahan banaya gaya
kisi ko jab bhi zarurat paḌi siyahi ki
hamara jism jala kar dhuan banaya gaya
bas ek main hi tha basti men bolne vaala
to sab se pahle mujhe be-zaban banaya gaya
Leave a Reply