yuun na jaao ki bahut raat abhi baaqi hai
mere hisse ki mulaqat abhi baaqi hai
raat mahkegi to ḳhvahish bhi bahak ja.egi
jo na ho paa.i hai vo baat abhi baaqi hai
ḳhair se mil ga.iin raten vo muradon vaali
aap ke husn ki ḳhairat abhi baaqi hai
chandni raat ka har qarz utara ham ne
pyase armanon ki barat abhi baaqi hai
us ke honTon ke gulab aaj bhi taaza hain ‘zamir’
ik mahakti hui saughat abhi baaqi hai
Leave a Reply