yuun mukafat-e-amal sab kuchh uTha kar le gaya
sar-phira sailab basti ko baha kar le gaya
saya-e-rahmat saron pe un ke rahta hai mudam
jab bhi koi apne dushman ko mana kar le gaya
jab khula bab-e-hidayat ishq-e-bazm-e-nur men
vadi-e-zulmat se aasi ko uTha kar le gaya
soz-e-batin se main rahta huun musalsal muztarib
ḳhauf-e-mahshar niind bhi meri uḌa kar le gaya
lapata hain jaane vaale yuun farishta maut ka
un ko har naqsh-e-qadam apna miTa kar le gaya
mil ga.i bar-e-ta.ayyush se mujhe ‘sahil’ najat
mal-o-zar rahzan mira saara chura kar le gaya
Leave a Reply