yuun dil taras raha hai tiri car dekh kar
lalcha.e jaise jaam ko mai-ḳhvar dekh kar
bala-e-bam ya pas-e-divar kaun jaa.e
husn-e-butan ko raunaq-e-bazar dekh kar
joḌe ka bhaav chahiye degrē ke vazn par
qimat baḌha raha huun ḳharidar dekh kar
ab rickshaw-ran bhi gaate hain maḳhdum ki ghazal
shayad asar hua hai ye bazar dekh kar
donon ka laal ḳhuun bhi kya ho gaya safed
laḌte hain log sub.ha-o-zunnar dekh kar
koi fasad chori Dakaiti na hadisa
hairan huun main aaj ka aḳhbar dekh kar
kis samt ja rahe hain bata.un main shaiḳh ji
andaza ho chuka hai ye raftar dekh kar
mulk-e-ḳhuda bhi tang hua pa-e-lang par
ahl-e-vatan ko bar-sar-e-paikar dekh kar
ab ai ‘rahim’ aap bhi sannyas lijiye
rahrav chale hai raah ko hamvar dekh kar
Leave a Reply