ye saare ḳhubsurat jism abhi mar jaane vaale hain
magar ham ishq vaale bhi kahan baaz aane vaale hain
haqiqat ka hamen kya ilm sachcha.i se kya matlab
hamare jitne bhi ma.ashuq hain afsane vaale hain
hamen masjid se kya jhagḌa magar bas ek mushkil hai
ki us ki or ke sab raste mai-ḳhane vaale hain
nafi ki salsi darkar hai jo faisla kar de
ki ham allah-miyan vaale hain ya but-ḳhane vaale hain
chalo gumrahiyon ki rui bhar lo apne kanon men
suna hai shaiḳh-sahab aaj kuchh farmane vaale hain
tum apne jism ka atish-kada kholo ki ham suufi
usi ki aag le kar ruuh ko garmane vaale hain
agarche ‘farhat-ehsas’ apna majnun shahr vaala hai
par us ke ishq ke andaz sab virane vaale hain
Leave a Reply