ye kis ki aarzu dil-e-shorida-sar men hai
duniya ḳhayal men hai na uqba nazar men hai
dil ko hai un ke va.ada-e-farda pe e’tibar
ab tak fareb-e-gardish-e-sham-o-sahar men hai
kya kijiye shikayat-e-hirman ki ham-nafas
ik mauj-e-infi.al kisi ki nazar men hai
rukte nahin hain pa-e-jihat-ashna kahin
manzil bhi ek sang-e-nishan rahguzar men hai
unvan kahun ki ‘raz’ use jan-e-dastan
ik ashk-e-muztarib jo abhi chashm-e-tar men hai
Leave a Reply