ye kaisa taghaful hai bata kyon nahin dete
honTon pe laga qufl haTa kyon nahin dete
jo mujh se adavat hai saza kyon nahin dete
ik zarb mire dil pe laga kyon nahin dete
dushman huun to nazron se gira kyon nahin dete
mujrim ko saliqe se saza kyon nahin dete
kis vaste rakhte ho ise dil se laga.e
chup-chap mera ḳhat ye jala kyon nahin dete
maana ki yahan jurm hai iz.har-e-mohabbat
ḳhamosh nigahon se sada kyon nahin dete
is dard-e-musalsal se bacha lo mujhe lillah
jab zaḳhm diya hai to dava kyon nahin dete
nafrat tumhen itni hi ujalon se agar hai
suraj ko bhi phunkon se bujha kyon nahin dete
sho.alon ki lapaT aa ga.i kya aap ke ghar tak
ab kya hua sho.alon ko hava kyon nahin dete
ab itni ḳhamoshi bhi ‘suhaib’ achchhi nahin hai
ahbab ko a.ina dikha kyon nahin dete
Leave a Reply