Sarvat Husain
ye jo phuuT baha hai dariya phir nahin hoga
ru-e-zamin par manzar aisa phir nahin hoga
zard gulab aur a.inon ko chahne vaali
aisi dhuup aur aisa savera phir nahin hoga
ghayal panchhi teri kunj men aan gira hai
is panchhi ka dusra phera phir nahin hoga
main ne ḳhud ko jam.a kiya pachchis baras men
ye saman to mujh se yakja phir nahin hoga
shahzadi tire mathe par ye zaḳhm rahega
lekin is ko chumne vaala phir nahin hoga
‘sarvat’ tum apne logon se yuun milte ho
jaise un logon se milna phir nahin hoga
Leave a Reply