ye daur-e-ḳhirad hai daur-e-junun is daur men jiina mushkil hai
angur ki mai ke dhoke men zahrab ka piina mushkil hai
jab naḳhun-e-vahshat chalte the roke se kisi ke ruk na sake
ab chak-e-dil-e-insaniyyat siite hain to siina mushkil hai
ik sabr ke ghunT se miT jaati tab tishna-labon ki tishna-labi
kam-zarfi-e-duniya ke sadqe ye ghunT bhi piina mushkil hai
vo sho.ala nahin jo bujh jaa.e andhi ke ek hi jhonke se
bujhne ka saliqa asan hai jalne ka qarina mushkil hai
karne ko rafu kar hi lenge duniya vaale sab zaḳhm apne
jo zaḳhm dil-e-insan pe laga us zaḳhm ka siina mushkil hai
vo mard nahin jo Dar jaa.e mahaul ke ḳhuni manzar se
is haal men jiina lazim hai jis haal men jiina mushkil hai
milne ko milega bil-aḳhir ai ‘arsh’ sukun-e-sahil bhi
tufan-e-havadis se lekin bach jaa.e safina mushkil hai
Leave a Reply