Ye Bose

Azra Abbas

tum mujhe maqruz kar dete ho

apne boson se

mira baal baal bandh gaya hai

is qarze men

roz bila-nagha

ye bose jaise apni yad-dasht

kho dete hain

jab ahista ahista main

apni ungliyan pherti huun

un ke sabt kiye hue nishanon par

ye meri poron par

apni koi lams nahin chhodte

un ki garm-joshi aur tapish

mere chehre par sarsarane ke bajae

havaon ki tundi se ja milti hai

aur

un patton se

jin ko paala maar gaya ho