Tajdar Adil
ye aankh bhi ye ḳhvab bhi ye raat usi ki
har baat pe yaad aa.i hai har baat usi ki
jugnu se chamakte hain usi yaad ke har-dam
ankhon men liye phirte hain saughat usi ki
har sho.ale ke pichhe hai usi aag ki surat
har baat ke parde men hikayat usi ki
phir vahshat-e-dil DhunDhti phirti hai hamesha
divangi-e-gham pe mudarat usi ki
a.ine ka aur aks ka rishta mira us ka
ab jiit miri us ki hai aur maat usi ki
lafzon men sajate hain usi husn ki ḳhushbu
ankhon men chhupate hain shikayat usi ki
kya kijiye achchhi hamen lagti hai hamesha
divangi-e-dil men har ik baat usi ki
jis shaḳhs ne manzar ko na.e phuul diye the
hain daur-e-ḳhizan par bhi inayat usi ki
aata hai nazar majma-e-ahbab men ‘adil’
lakhon men akeli hai magar zaat usi ki
Leave a Reply