Yar Se Ab Ke Gar Milun Taban

yaar se ab ke gar milun ‘taban’

to phir us se juda na huun ‘taban’

ya bhare ab ke us se dil mera

ishq ka naam phir na luun ‘taban’

mujh se bimar hai mira zalim

ye sitam kis tarah sahun ‘taban’

aaj aaya hai yaar ghar mere

ye khushi kis se main kahun ‘taban’

main to bezar us se huun lekin

dil ke hathon se kya karun ‘taban’

vo to sunta nahin kisi ki baat

us se main haal kya kahun ‘taban’

baad muddat ke mah-ru aaya

kyuun na us ke gale lagun ‘taban’

Leave a Comment