yaqin had se baḌha tha guman se pahle
jabin pe zaḳhm saja tha nishan se pahle
use bhulane ke raste men kitni yaden thiin
shadid dhuup mili sa.eban se pahle
phir us ke ba.ad havaon se jang karta raha
diya jala tha baḌi an-ban se pahle
mire ḳhilaf muqabil na tha munafiq tha
javab DhunDh raha tha bayan se pahle
natija us ke hi haq men hai ab mohabbat ka
jo saath chhoḌ gaya imtihan se pahle
charagh-e-sham ki surat men us ki yaad aa.i
andhere phailte jaate the shaan se pahle
tamam shahr ne izzat usi se hasil ki
jo rasm aa.i hamare makan se pahle
dayar-e-jan pe bhi kuchh barish-e-karam ho jaa.e
basao dil bhi kisi ka makan se pahle
shikasta dil ke liye the jo aasra ‘adil’
vo taare TuuT ga.e asman se pahle
Leave a Reply