yahi Thahra ki ab us or jaana bhi nahin hai
ye duuji baat vo kucha bhulana bhi nahin hai
bue-e-sad-gul men bhige ho naha.e ho dhanak men
mohabbat kar rahe ho aur batana bhi nahin hai
darun-e-dil hi rakkho vaan hifazat men rahega
vo ik raz-e-nahufta jo chhupana bhi nahin hai
na baran hai nahin tufan na jhakkaḌ hai na sarsar
miri zambil men ab ik bahana bhi nahin hai
ilaqa sabz hai mera mohabbat ke shajar se
ka.i sadiyon pe phaila hai purana bhi nahin hai
hava de aanch dhimi rakh sulagne de junun ko
ye sho.ala narm rakhna hai jalana bhi nahin hai
agarche dard ki tarsil ka vahid hai baa.is
junun pesha ne tera gham ganvana bhi nahin hai
ajab ik dhup-chhanv si racha rakhi hai tu ne
nahin hota mira lekin bigana bhi nahin hai
sameTa jaa.e sad-para jigar yaaro ki ham ne
tamasha-e-dil-e-ḳhasta manana bhi nahin hai
Leave a Reply