yahi nahin koi tufan miri talash men hai
ki mausam-e-gham-e-janan miri talash men hai
visal-rut hai magar dil ko aisa lagta hai
sitara-e-shab-e-hijran miri talash men hai
main faisle ki ghadi se guzar chuki huun magar
kisi ka dida-e-hairan miri talash men hai
ye be-yaqin si asudgi batati hai
ki ek qarya-e-viran miri talash men hai
main tirgi men mohabbat ki ik kahani huun
muui charagh sa unvan miri talash men hai
ye kaisa khvab tha dhadka sa lag gaya dil ko
ki ek shakhs pareshan miri talash men hai
Leave a Reply