Shaad Aarfi
yahan nahin hai vahan nahin hai idhar nahin hai udhar nahin hai
magar kisi tarah dil nahin manta ki vo jalva-gar nahin hai
kisi bhi dar par ilaj-e-avezish-e-yaqin-o-guman na hoga
idhar chala aa ki mai-kade men agar nahin hai magar nahin hai
hazar-ha samne ki baton se jaan paḌti hai sha.iri men
vo kaun se pesh-e-pa mazamin hain jin pe meri nazar nahin hai
jabin pe bindi nazar men jaadu labon pa bijli kamar pe gesu
vo meri hairat ko dekhte hain unhen kuchh apni ḳhabar nahin hai
nahin jo qasid ka ana-jana fareb khane laga zamana
to ye haqiqat ki rabt-e-behad ko hajat-e-nama-bar nahin hai
naqab uThne men der kyon hai ye kaun samjhe ye kaun jaane
kise ḳhabar hai ki ḳhvahish-e-did vaqt se peshtar nahin hai
ghalat-bayani se ‘shad’ ahl-e-suḳhan abhi kaam le rahe hain
nahin hai har-chand vo zamana dahan nahin hai kamar nahin hai
Leave a Reply