Nuzhat Abbasi
yaad rakhne ka bhi va.ada ho zaruri to nahin
bhuul jaane ka irada ho zaruri to nahin
naam achchha sa koi ham ne rakha hai likh kar
dil ka kaghaz abhi saada ho zaruri to nahin
is tabassum ko mire dukh ki alamat na samajh
ye kisi gham ka labada ho zaruri to nahin
yunhi ik baar kabhi ek nazar Daali thi
us ko ehsas ziyada ho zaruri to nahin
haan hisab-e-gham-e-dauran to bahut mushkil hai
aur phir us ka i.aada ho zaruri to nahin
besh-qimat hai bahut surḳhi-e-ḳhun-e-dil bhi
ru-ba-ru jaam men baada ho zaruri to nahin
saari duniya ke ḳhazane bhi mayassar hon jise
haath bhi us ka kushada ho zaruri to nahin
Leave a Reply