vus.at-e-kaun-o-makan men vo samate bhi nahin
jalva-afroz bhi hain samne aate bhi nahin
parsa.i ka hamari nahin duniya men javab
vaqt aa jaa.e to daman ko bachate bhi nahin
ham vo mai-kash hain ki saaqi ki nazar phirte hi
jaam ki samt nigahon ko uThate bhi nahin
ḳhud hi rang-e-ruḳh-e-mahbub uḌa jaata hai
ham to rudad-e-gham-e-ishq sunate bhi nahin
bu-e-gul jin ka kiya karti thi rah rah ke tavaf
ab chaman men vo nasheman nazar aate bhi nahin
ham vo barbad-e-mohabbat hain ḳhuda shahid hai
aag dil men jo lagi ho to bujhate bhi nahin
vaqt nazuk hai ye kya soch rahe ho ‘sha.ir’
aisi zulmat men koi sham.a jalate bhi nahin
Leave a Reply