vo to itna hi kare aap ka chehra dekhe
ishq jab hone lage dauḌ ke duniya dekhe
aankh khul jaa.e to vo tera hi rasta dekhe
aankh lag jaa.e to vo ḳhvab bhi tera dekhe
main bhala us ke bharose pe kahan tak jaata
raah men jis ne shajar mujh se ziyada dekhe
jo zaban vaala hai chup-chap nikal jaa.e aur
jo nazar vaala hai vo sirf tamasha dekhe
duniya-dari se bahalte nahin divane log
shiddat-e-pyas to har samt hi dariya dekhe
varna ik umr hui bhiiḌ men hanste ham ko
us ki qismat jo hamen samne rota dekhe
vo kabhi chand sa khil jaa.e miri khiḌki par
mujh ko muddat hui raton men ujala dekhe
Leave a Reply