us ke karam se hai na tumhari nazar se hai
mausam dilon ka dard ke raushan shajar se hai
jis se mire vajud ke pahlu ayaan hue
shayad mira mo.amla us ke hunar se hai
haa.il hua na koi ta.alluq ki raah men
daa.im tamam silsila bint-e-sahar se hai
aaya na vo haram men imamat ke vaste
kuchh rabt hi ajiib use apne ghar se hai
apni gali men nasb hai vo sang-e-be-nava
kahte hain garche vasta us ko safar se hai
us ke siva na dil ki hikayat koi paḌhe
mansub meri dastan ik dida-var se hai
mahsus kis tarah ho mujhe dhuup ka azaab
‘almas’ karobar mira bad-e-tar se hai
Leave a Reply