Nilofar Noor
lauT aa.e vo ya-ḳhuda phir se
main ne mangi hai ye dua phir se
TuuT kar main bikhar bhi sakti huun
dekh mujh ko na aazma phir se
har qadam pe sambhal ke chalti huun
ho na jaa.e koi ḳhata phir se
ret muTThi men le ke baiThi huun
dekh badlega zaviya phir se
baat ahl-e-vafa ki nikli thi
aap ka zikr aa gaya phir se
apni chahat pe maan hai itna
dil na toḌenge vo mera phir se
‘nur’ tanha.iyon se Darti hai
paas apne mujhe bula phir se
Leave a Reply