Wo Roz-O-Shab Bhi Nahin Hain Wo Rang-O-Bu Bhi Nahin

Farigh Bukhari

vo roz-o-shab bhi nahin hain vo rang-o-bu bhi nahin

vo bazm-e-jam-o-subu bhi nahin vo tu bhi nahin

na dil dhaḌakte hain mil kar na ankhen jhukti hain

lahu ki gardishen ab misl-e-abju bhi nahin

kabhi kabhi ki mulaqat thi sau vo bhi ga.i

tiri nigah ka rang-e-bahana-ju bhi nahin

kab aftab Dhale aur chandni chhiTke

kisi ko ab ye sar-e-sham justuju bhi nahin

bas ab to yaad se hi zindagi ibarat hai

kahan ka va.ada ki milne ki aarzu bhi nahin

ki jaise bhige paron se uḌanen chhin jaa.en

dilon ki sozish-e-be-nam ku-ba-ku bhi nahin

vo jis ki garmi qayamat uTha rahi thi kabhi

usi badan ko jo kaaTo to ab lahu bhi nahin

lagi hai tiis baras se hamare ḳhuun ki jhaḌi

magar abhi shajar-e-dar surḳh-ru bhi nahin

main sochta huun ji.en bhi to kis liye ‘farigh’

ki ab to shahr men pahli si aabru bhi nahin