Wo Kitab

miri zindagi ki likhi hui

mire taq-e-dil pe saji hui

vo kitab ab bhi hai muntazir

jise main kabhi nahin padh saki

vo tamam baab sabhi varaq

hain abhi talak bhi jude hue

mira ahd-e-did bhi aaj tak

unhen vo judai na de saka

jo har ik kitab ki ruuh hai

mujhe khauf hai ki kitab men

mire roz-o-shab ki aziyyaten

vo nadamaten vo malamaten

kisi hashiye pe raqam na hon

main fareb-khurda-e-bartari

main asir-e-halqa-e-buz-dili

vo kitab kaise padhungi main?

Leave a Comment