Nooh Narvi
vo karenge mira qusur muaaf
ho chuka kar chuke zarur muaaf
husn ko be-qusur kahte hain
hai qusur aap ka qusur muaaf
main ne ye jaan kar ḳhata.en kiin
har ḳhata hogi bizzarur muaaf
vo hansi aa ga.i tire lab par
ho gaya vo mira qusur muaaf
be-ḳhudi men jo ho ḳhata ham se
kam se kam vo to ho zarur muaaf
ḳhamushi un ki mujh se kahti hai
ab hua ab hua qusur muaaf
phir na tum baḳhshna kabhi mujh ko
pahli taqsir ho zarur muaaf
haath bhi joḌe paanv par bhi gira
ab to kah do kiya qusur muaaf
hai yahi kaam us ki rahmat ka
honge mere gunah zarur muaaf
aur aadat miri ḳharab hui
kaash karte na vo qusur muaaf
ḳhud ye iqrar-e-jurm karte hain
kijiye ‘nuh’ ko zarur muaaf
Leave a Reply