vo barq-e-naz gurezan nahin to kuchh bhi nahin
magar sharik-e-rag-e-jan nahin to kuchh bhi nahin
hazar dil hai tira mashriq-e-mah-o-ḳhurshid
ghubar-e-manzil-e-janan nahin to kuchh bhi nahin
bahar-e-gul-kada-e-naz dil-kusha hai magar
nasim-e-shauq ḳhiraman nahin to kuchh bhi nahin
hai ḳhalvat-e-dil-e-viran hi manzil-e-mahbub
ye ḳhalvat-e-dil-e-viran nahin to kuchh bhi nahin
har ek saans ho atish-kada to kya hasil
gudaz shola-e-pinhan nahin to kuchh bhi nahin
baghair ishq hai rudad-e-zindagi tarik
ye lafz zinat-e-unvan nahin to kuchh bhi nahin
bahut buland hai dil ka maqam-e-ḳhuddari
magar shikast ka imkan nahin to kuchh bhi nahin
sukun-e-shauq ho ya iztirab-e-shauq ‘ravish’
agar ba-manzila-e-jan nahin to kuchh bhi nahin
Leave a Reply