vaqt ho raha hai phir zau-fishan hatheli par
naqsh hain muqaddar ki surḳhiyan hatheli par
mahram-e-basirat tha dil men gaḌ ga.iin aḳhir
rokta bhala kab tak barchhiyan hatheli par
sar-burida logon ka in dinon paḌosi huun
aur uTha.e phirta huun ashiyan hatheli par
ab ke bhi nahin aaya abr-o-bad ka mausam
buund ko tarasti hain sipiyan hatheli par
jab gharon ke angan men chandni bikharti hai
ḳhun-e-dil sajati hain laḌkiyan hatheli par
sehn-e-gul ki raunaq hain qaid kar nahin sakte
rang chhoḌ jaati hain titliyan hatheli par
pattharon se Takra kar chuur ho gaya ‘saghar’
ham saja.e phirte hain kirchiyan hatheli par
Leave a Reply