Husn Paband-E-Jafa Ho Jaise

husn paband-e-jafa ho jaise

ye koi ḳhaas ada ho jaise

yuun tiri yaad hai mire dil men

kisi marghaT men diya ho jaise

ho gaya suukh ke kanTa har phuul

ye mahakne ki saza ho jaise

meri furqat ka gham-agin aalam

chhup ke tu dekh raha ho jaise

kashtiyan gharq hui jaati hain

naḳhuda ho na ḳhuda ho jaise

allah allah tira andaz-e-ḳhiram

har qadam mauj-e-saba ho jaise

kitni pur-kaif hai ye zulmat-e-shab

teri zulfon ki ghaTa ho jaise

tere honTon pe tabassum tauba

mah-o-anjum ki ziya ho jaise

un se karta huun taghaful ka gila

ishq men ye bhi rava ho jaise

is tarah ishq se dil-shad hain ham

yahi har gham ki dava ho jaise

us se aati nahin ab koi sada

saz-e-dil TuuT gaya ho jaise

dekh kar tujh ko ye hota hai guman

tu mire dukh ki dava ho jaise

un ko yuun DhunD raha huun ‘parvez’

ishq se husn juda ho jaise