mujhe saanp sidhi ke
is khel se
aaj ghin aa rahi hai
mire dil ke panse pe khode gae
ye adad
mujh ko mahdud karne lage hain
bisat-e-ziyan par
mire khvab ka reshmi azhdaha
chaal ke pairahan ko nigalne laga hai
meri jast ki sidhiyan
sokhta haDDiyon ki tarah
bhurnhuri ho ke
jhadne lagi hain
khel hi khel men
sabz chaukor khane
kisi qabr ki chaar divar ban kar
mira dam nigalne lage hain
so ai vaqt!
mere muqabil khiladi
aaj se tu bhi azad hai
main bhi azad huun