vajud ḳhvab men Dhal kar niDhal thoḌi hai
mire shu.ur men itni majal thoḌi hai
zamana biit gaya ḳhud se rasm-o-rah kiye
hamara ḳhud se ta.alluq bahal thoḌi hai
mire zamin se uThte hue vajud ko dekh
ye raqs-e-vajd hai pagal dhamal thoḌi hai
har ik maqam pe qaa.em rahe hain hosh-o-havas
hamari qais ke jaisi misal thoḌi hai
ata hui hai kisi dard intiha ke evaz
ye sha.iri mira apna kamal thoḌi hai
ye zindagi hai kisi aur imtihan ka rog
mire nisab men shamil saval thoḌi hai
haqa.eq-e-gham-e-duniya se mat chura ankhen
saron pe hijr tana hai visal thoḌi hai
hamen to ‘abdi’ sha.ir bana diya us ne
ye ishq kar-e-suḳhan hai vabal thoḌi hai
Leave a Reply